غزل

٭……اکبر حسین اکبر الہ آبادی

رنگِ شراب سے مری نیت بدل گئی
واعظ کی باتیں رہ گئیں ساقی کی چل گئی
تیار تھے نماز پہ ہم، سن کے ذکرِ حور
جلوہ بُتوں کا دیکھ کے نیت بدل گئی
مچھلی نے ڈھیل پائی ہے، لُقمے یہ شاد ہے
صَیاّد مطمئن ہے کہ کانٹا نگل گئی
چمکا ترا جمال جو محفل میں وقتِ شام
پروانہ بے قرار ہوا، شمع جل گئی
عقبیٰ کی باز پُرس کا جاتا رہا خیال
دنیا کی لذتوں میں طبیعت بہل گئی
حسرت بہت ترقیٔ دُختر کی تھی انہیں
پردہ جو اُٹھ گیا تو وہ آخر نکل گئی