Tumhaare lahaje mei'n jo garmii-o-halaavat hai
Ise bhalaa saa koii naam do vafaa kii jagah
Ghaniim-e-noor kaa hamalaa kaho andhero’n par
Dayaar-e-dard mei'n aamad kaho masiihaa kii
Ravaan-davaan hue Khushbuu ke qaafile har suu
Khalaa-e-subah mei’n guunjii sahar kii shahanaaii
Ye ek koharaa saa ye dhundh sii jo chhaaii hai
Is iltahaab me surmagiin ujaale me
Sivaa tumhaare mujhe kuchh nazar nahii aataa
Hayaat naam hai yaado’n kaa talkh aur shiirii’n
Bhalaa kisii ne kabhii rang-o-buu ko pakadaa hai
Shafaq ko qaid me’n rakhaa sabaa ko band kiyaa
Har ek lamahaa gurezaa’n hai jaise dushman hai
Na tum milogii na mai’n ham bhii dono’n lamhe hai’n
Vo lamhe’n jaake jo vaapas kabhii nahii’n aate