Kaam ab koii na aayegaa bas ik dil ke sivaa
Raaste band hai'n sab kuuchaa-e-qaatil ke sivaa

Baais-e-rashq hai tanhaaravii-e-rahrau-e-shauq
Hamsafar koii nahii'n duurii-e-manzil ke sivaa

Ham ne duniyaa kii har ik shai se uThaayaa dil ko
Lekin ik shokh ke hangaamaa-e-mahafil ke sivaa

Tegh munsif ho jahaa’N daar-o-rasan ho’n shaahid
Begunaah kaun hai us shahar me qaatil ke sivaa

Jaane kis rang se aaii hai gulshan me’n bahaar
Koii naghmaa hii nahii shor-e-silaasil ke sivaa