غزل

اب کے شعور و فکر پر غالب یوں شر ہوا
ویران شہر شہر کا اک ایک گھر ہوا

کلیاں کھلیں ، گلاب ہنسے ، برگ جھوم اٹھے
بادِ صبا کا غنچہ و گل سے گزر ہوا

سہنی پڑیں صدف میں ہزاروں صعوبتیں
تب جاکے ایک پانی کا قطرہ گہر ہوا

بعدِ بہار دورِ خزاں کا ستم تو دیکھ
گلشن میں اک ایک برہنہ شجر ہوا

زیبا نہیں غرور کسی بھی طرح جناب
شاخیں جھکا لیا جو شجر پر ثمر ہوا

حیرت سے تک رہے ہیں ہنر مند آجکل
افسوس سر بلند ہر اک بے ہنر ہوا

یوں کر سفر حیات کا زندہ دلی کے ساتھ
جیسے اندھیری رات پہ غالب قمر ہوا

شیطانیت بھی ہوگئی شرمندہ ان دنوں
انسانیت سے دور کچھ ایسا بشر ہوا

منزل کی جستجو کا تصوّر فضول ہے
گمراہ راستے میں جو خود راہبر ہوا

جو بھی پڑا حسین تبسم کے پھیر میں
طاہر وہ ساری عمر کو با چشم تر ہوا

علیم طاہر

Mominpura, Survey No.19, H.No.51,
Maligaon, Nasic (M.S)
Mob: 9323177531 , 8976294034
Email: aleemtahir12@gmail.com
بشکریہ: مشتاق دربھنگوی
…………………