Nahi'n minnat-kash-e-tab-e-shanida'n dasta'n meri,
khamoshi guftagu hai, bezubani hai zaba'n meri,

ye dastur-e-zaba'n-bandi hai kaisi teri mahfil mei'n,
yaha'n to baat karne ko tarasti hai zaba'n meri,

uthaye kuchh waraq lala ne kuchh nargis ne kuchh gul ne,
chaman mei'n har taraf bikhri hui hai dasta'n meri,

Urha li kumariyo'n ne tutiyo'n ne andlibo'n ne,
chaman walo'n ne mil kar lut li tarz-e-fuga'n meri,

tapak ai shama ansu ban ke parwane ki ankho'n se,
sarapa dard hu'n hasrat bhari hai dasta'n meri,

ilahi phir maza kya hai yaha'n duniya mei'n rahne ka,
hayat-e-jawida'n meri na marg-e-nagaha'n meri.