لب کی مرے دعا ہے صل علیٰ محمدؐ
دل کا بھی مدعا ہے صل علیٰ محمدؐ

روح و نظر کی پاکی انعام ہے اسی کا
ایمان و اتّقا ہے صل علیٰ محمدؐ

دیدار ربّ اعلیٰ کا ہے یہی وسیلہ
عرفان و ارتقا ہے صل علیٰ محمدؐ

گر ہے زبانِ دل پر ہر وقت ورد اُس کا
بے شک خدا نما ہے صل علیٰ محمدؐ

انفاس میں امانت کی طرح رکھئے اس کو
اک دردِ بے بہا ہے صل علیٰ محمدؐ

گلزارِ قلب و جاں کی مسموم جب ہوا ہو
راحت فزا بسا ہے صل علیٰ محمدؐ

راہِ طلب میں جب بھی جاں پر بنی ہوئی ہو
جاں بخش و دل کشا ہے صل علیٰ محمدؐ

دشتِ وفا میں جب بھی ہو دل گداز موسم
جھونکا نسیم کا ہے صل علیٰ محمدؐ

سرشار ہیں فضائیں گلزارِ آرزو کی
پُرکیف وہ گھٹا ہے صل علیٰ محمدؐ

کتنے ہی نور پیکر جلوے جھلک رہے ہیں
نادر وہ آئینہ ہے صل علیٰ محمدؐ

چھٹ جاتی ہیں گھٹائیں چرخِ دل و نظر کی
ظلمات میں ضیا ہے صل علیٰ محمدؐ

تیرہ دلی نے جب بھی بے حال کردیا ہو
قندیل ضو فزا ہے صل علیٰ محمدؐ

سیلِ نشاط سے جب سرشار روح و جاں ہوں
دل دار و کیف زا ہے صل علیٰ محمدؐ

کیوں ہوں نہ لب ہمارے مصروفِ نعت خوانی
وردِ ملائکہ ہے صل علیٰ محمدؐ

فانوس جاں ہے روشن ہر ہر قدم پہ جس سے
وہ حرف نور کا ہے صل علیٰ محمدؐ

رنگِ ریا سے جب ہوں دامانِ دل پہ دھبّے
اک کلمۂ صفا ہے صل علیٰ محمدؐ

وردِ زبان رکھئے شبلیؔ اسے ہمیشہ
’’ہر درد کی دوا ہے صل علیٰ محمدؐ ‘‘

علقمہ شبلیؔ 

89/5, Ripon Street
Shibli House, Kolkata-700016
Phone: (033)65103844
بشکریہ ’’صل علیٰ محمد‘‘ 	مرتب: مشتاق دربھنگوی
……………………………