* Jho’nkaa idhar na aaye nasiim-e-bahaar kaa *
Jho’nkaa idhar na aaye nasiim-e-bahaar kaa
naazuk bahut hai phuul charaagh-e-mazaar kaa
phir baithe baithe vaadaa-e-vasl us ne kar liyaa
phir uth khadaa huaa vahii rog intazaar kaa
shaakho’’n se barg-e-gul nahii'n jhadte hai’n baagh me
zevar utaar rahaa hai uruus-e-bahaar kaa
har gul se laalaazaar me ye puuchhtaa hoo’n mai’n
tuu hii pataa bataade dil-e-daaghdaar kaa
is pyaar se fishaar diyaa gor-e-tang ne
yaad aa gayaa mazaa mujhe aaghosh-e-yaar kaa
hiltii nahii’n havaa se chaman me ye daaliyaa’n
muu’nh chuumte hai’n phuul uruus-e-bahaar kaa
uthataa hai naazaa me vo sarhaane se ai 'Ameer'
mitataa hai aasaraa dil-e-ummiidvaar kaa
|