غزل

مجھے رہبر پہ رہزن کا گماں ہے
برائے نام اب امن و اماں ہے
خدا رکھے وہی اک رازداں ہے
زباں رکھتے ہوئے جو بے زباں ہے
ہمارا قافلہ لوٹا تھا جس نے
وہ رہزن آج میرِ کارواں ہے
محافظ روبرو ہے اور نشیمن
نظر کے سامنے شعلہ فشاں ہے
زبوں حالی پہ میری خوب ہنس لو
ابھی باقی تمہارا امتحاں ہے
مٹانے والے مٹتے جارہے ہیں
یہ کیا تجھ میں اثر اردو زباں ہے
چھپالے دل میں اُس کے غم کو انجم
کہ یہ غم دولتِ کون و مکاں ہے

انجم باروی

I-92, Rameshwarpur Road, Matia Burj
Kolkata- 700024
Mob: 9331238703
بشکریہ ’’میر بھی ہم بھی‘‘	مرتب: مشتاق دربھنگوی
………………………