* Daalaano’n me kamaro’n me ulajhaaye huye rakhnaa *
Daalaano’n me kamaro’n me ulajhaaye huye rakhnaa
kuchh kaam me apne ko bahalaaye huye rakhnaa
duniyaa ke masaail me uljhaa huaa jab aauu’n
tum ghar ke masaail ko suljhaaye huye rakhnaa
sanduuk ke kapdo’n ko kuchh dhuup dikhaa denaa
tum sahan me jaade ko phailaaye huye rakhnaa
mai’n dhuup ke sahraa se jhulsaa huaa aauu’ngaa
shaano’n pe ghataao’n ko Thaharaaye huye rakhnaa
ho jaayen kabhii shab me’n bachcho’n se bhii do baate’n
pariyo’n kii kahaanii ko doharaaye huye rakhnaa
dhundhlaa na kahii’n kar de kuchh ghar kii pareshaanii
aaiinaa-e-rukh apnaa chamkaaye huye rakhnaa
ik umr pe bhii us kaa andaaz vahii 'Anjum'
kamre me qadam rakhnaa sharmaaye huye rakhnaa
|