Baraay-e-naam sahii koii meharbaan to hai,
hamaare sar pe bhii hone ko aasmaan to hai,

terii faraaKh_dilii ko duaaye.n detaa huu.N,
mere labo.n pe tere lams kaa nishaan to hai,

[faraaKh_dilii = large hearted]

ye aur baat ki vo ab yahaa.N nahii.n rahataa,
magar ye us kaa basaayaa huaa makaan to hai,

alaavaa is ke na kuchh aur pardaa rakh mujh se,
fasiil-e-jism mere tere darmiyaa’n to hai,

[  fasiil = barrier]

bichha.D ke zindaa nahii.n rah sake.nge ham dono.n,
mujhe ye vaham to hai un ko ye gumaan to hai,

[vaham = imagination; gumaan =suspicion]

saro.n pe saayaa_fiGhan abr-e-aarazuu na sahii,
hamaare paas saraabo.n kaa saayabaan to hai,

gul-e-muraad nahii.n sang-haaye-tifl sahii,
Ghariib-e-shahar kaa aaKhir kisii ko dhyaan to hai.