غزل

محوِ حیرت ہیں جمالِ چشمِ دلبر دیکھ کر
مست و بیخود ہوگئے ہم ، مے کا ساغر دیکھ کر
غیظ سے اُن کے عیاں ہے میری بدبختی کا راز
پڑھ لیا قسمت کا لکھا ہم نے تیور دیکھ کر
جان تک جائے تو کچھ پروا نہیں، جانباز ہیں
ہم نہیں ڈرتے کبھی شمشیر و خنجر دیکھ کر
بے کلی کچھ اور ہی بڑھنے لگی گلشن میں آہ
گل کو خنداں دیکھ کر، بلبل کو مضطر دیکھ کر
وہ مظالم ہم پہ ڈھائے ہیں کہ پتھر کا بھی دل
پانی پانی ہوگیا جورِ ستم گر دیکھ کر
بے رُخیٔ دوست ، بیتابیٔ دل ، جورِ فلک
رونا آتا ہے مجھے اپنا مقدر دیکھ کر
عارف افسانے میں تیرے ہے قیامت کا اثر
دل پھٹا جاتا ہے تیرے غم کا دفتر دیکھ کر

عارف گیاوی

Imam Jama Masjid
Sakchi, Jamshedpur (Jharkand)
Mob: 9470524730
بشکریہ ’’میر بھی ہم بھی‘‘	مرتب: مشتاق دربھنگوی
………………………