rah e Hayaat ke khaaroN ko sochnaa hoga
 
hum aag haiN yeh sharaaroN ko sochnaa hoga
==================================
 
faqat hameiN pe nahiN inqelaab hai mauqoof
hamari tar’H hazaaroN ko sochnaa hoga
==================================
 
phir un ke baa’d bhee qaayem rahe nizaam e chaman
chaman se jaatee bahaaroN ko sochnaa hoga
======================================
 
kahaaN gayaa who tamawuuj, sukoot hai kyuNkar
yeh ab nadee ke kanaaroN ko sochnaa hoga
===================================
 
chipak nahiN rahee mittee meiN yaa hai chaak meiN nuqS
zuroof kaj haiN , kumhaaroN ko sochnaa hoga
=======================================
 
hunood hoN yaa musalmaaN, hoN sikh yaa eesaayi
watan ke waste saaroN ko sochnaa hoga
=======================================
 
huaa main tal’f to dekhe gaa kauN kaar e junooN
mere liye mere yaaroN ko sochnaa hoga
=======================================
 
woh aayinaa huN main thahree nah jis pe gard kabhi
yeh mujh meiN uthte ghubaaroN ko sochnaa hogaa
=========================================
 
diloN kaa nazm bhi ab ho gayaa hai laa silkee
rakheiN kahaaN bhalaa taaroN ko, sochnaa hogaa
==========================================
 
hai taNg arsa e hastee ab hum pe bhee SARIM
hameiN bhee ab kaheiN ghaaroN ko sochna hoga
=======================================