غزل

٭……اصغر حسین اصغرؔ گونڈوی

اسرارِ عشق ہے دل مضطر لئے ہوئے
قطرہ ہے بے قرار سمندر لئے ہوئے
موجِ نسیم صبح کے قربان  جانئے
آئی ہے بوُئے زُلفِ معنبر لئے ہوئے
کیا مستیاں چمن میں ہیں جوشِ بہار سے
ہر شاخِ گل ہے ہاتھ میں ساغر لئے ہوئے
پہلی نظر بھی آپ کی اُف کس بلا کی تھی
ہم آج تک وہ چوٹ ہیں دل پر لئے ہوئے
تصویر ہے کھینچی ہوئی ناز و نیاز کی
میں سرجھکائے اور وہ خنجر لئے ہوئے
میں کیا کہوں، کہاں ہے محبت کہاں نہیں
رگ رگ میں دوڑی پھرتی ہے نشتر لئے ہوئے
اصغر حریمِ عشق میں ہستی ہی جرم ہے
رکھنا کبھی نہ پائوں یہاں سر لئے ہوئے
*****