KHANAE DAMAD
MAI'N HOO'N DAMAD KI AZMAT KO BADHANE WALA,
NAGHMAE JANNATE SUSRAL SUNANE WALA,
DHAU'NS HAR SALI VO SALE PE JAMANE WALA,
YAANI BE WAQT KI SHAHNAAII BAJANE WALA,
NA TO DAAMIQ HOO'N,NA MAJNOO'N HOO'N,NA FARHAAD HOO'N MAI'N,
KHAANA DAAMAD HAI TAAREEF MERI,SHAAD HOO'N MAI'N,
MERI NAZRO'N MEI'N HAI SASURAAL KI DAULAT KI BAHAAR,
MERI PESHAANI PE HAI KHUSAR KE JOOTE KA WEQAAR,
CHAAT'TA RAHTA HOO'NLAALACH KA KHOSHAAMD KA ACHAAR,
MERE MEDE MEI'N PHA'NSI MURGH MOSALLAM KI DAKAAR,
SHUKR SASURAAL KI NEMAT KA ADA KARTA HOO'N,
BAAD HAR KHAANE KE, TAUSEEF O SANA KARTA HOO'N,
IZZATE NIFS KO CHAURAAHE PE KARKE NIILAAM,,
TORH KAR HAATHO'N SE KHUD DAARIYE KARDAAR KA JAAM,
ZULFE AGHIYAAR SE JAB BAANDH DI QISMAT KI LAGAAM,
TAB KAHI'N JAAKE MAYESSAR HUA SHAADI KA PYAAM,
RISHTAYE ZULF IS ANDAAZ SE JORHAA MAI'N NE,
KISI QIMAT PE NA SASURAAL KO CHHORHAA MAI'N NE,
KIS TARAH GHAR SE APNE KO NIKAALA DEKHO,
AAKE SASURAAL KI CHOWKHAT KO SAMBHAALA DEKHO,
APNA MOO'NH AAP KIYA MAI'N NE KAALA DEKHO,
NAAM DAAMAD KA KYA KHOOB UCHHAALA DEKHO,
HAWASE GUL MEI'N MAI'N AADABE CHAMAN BHOOL GAYA,
RAH KE SASURAAL MEI'N ABBA KA WATAN BHOOL GAYA,
MUFT ROTI HAI BHARI PET KI ANGNAAYI MEI'N,
KITNI NAAKE'N HAI'N KATI IK MERI NIKTAAYI MEI'N,
MOTIA BIND PARHA AQL KI BIINAYII MEI'N,
AB TO KUCHH BHI NAHI BAAQI MERI RUSWAAYI MEI'N,
GHAR KE HAR FARD KA IK BANDAE BE DAAM HOO'N MAI'N,
BAZM YAARA'N MEI'N ISI WAJAH SE BADNAAM HOO'N MAI'N,
TANZ SE KAHTA HAI HAR SHAKHS CHIRHII MAAR HO TUM,
APNI SASURAAL KE DARBAANE TARAHDAAR HO TUM,
PHABTI KASTA HAI KOI MURGHE GIRIFTAAR HO TUM,
KOI KAHTA HAI KE BEGUM KE NAMAK KHWAAR HO TUM,
RASHK HAI QISMATE DAMAAD PE DIIWAANO'N KO,
BAAT KARNE KA SALIQAA NAHI NADAANO'N KO,
AB ZARA SHIKWAE ARBAAB WAFA BHI SUN LE'N,
KHAANAE DAMAAD SE THORHA SA GILA BHI SUN LE'N,
AIK TOOTE HUE BAAJE KI SADA BHI SUN LE'N,
MERI TAQDEER KI AAWAZ ZARA BHI SUN LE'N,
SAAS KE HUKM KO FARMAAN ILAAHI SAMJHA,
UNKI NAARAZGI KO APNI TABAHI SAMJHA,
APNI HIKMAT SE KIYA KHUSAR KO NAAZA'N MAI'N NE,
APNI KHIDMAT SE KIYA SAAS KO HAIRAA'N MAI'N NE,
APNE TOHFO'N SE KIYA UN KO BHI KHANDAA'N MAI'N NE,
APNE AA'NSOO SE KIYA GHAR MEI'N CHIRAAGHAA'N MAI'N NE,
LEKIN IK WOH HAI'N KE HAR AHDE WAFA BHOOL GAYE,
MERE ISAAR MERE SABRO RAZA BHOOL GAYE,
QIBLA KAHTE HAI'N CIGRATE TOO JAA KAR LAA DO,
SAAS KAHT HAI KE AALOO WA CHUQANDDER LAA DO,
SAALA KAHTA HAI KE ACHCHAA SA CALENDER LAA DO,
SAALI KAHTI HAI KE JUMPER MERA DHO KAR LAA DO,
MAI'N TO AAYA THA KE HAR DAM YAHA'N DILSHAAD RAHOO'N,
GHAR KA NAUKAR NA BANOO'N SOORATE DAMAAD RAHOO'N,
ROOH MAGHMOOM HAI"ASRAR" KI GULKAARI SE,
QALB BECHAIN HAI APNO'N KI SITAMGAARI SE,
ZINDAGI TALKH HAI SAALI KI DIL AAZARI SE,
SARD JAZBAAT HAI BEGAM KI JAFA KAARI SE,
YAA KHODA CHAARO'N TARAF GHAM KI FARAWAANI HAI,
KHANA DAMAAD GIRIFTAAR PARESHAANI HAI.