غزل

احبابِ پُرخلوص کو یکجا کیا گیا
پھر مجھ کو اہتمام سے رسوا کیا گیا
جب سامنے سے زیر نہ کرپایا وہ حریف
پیچھے سے میری پشت پر حملہ کیا گیا
پردے عطا کئے گئے رسوائیوں کے بعد
پہلے مری انا کو برہنہ کیا گیا
ہوتا رہا یہ سانحہ ہر روز میرے ساتھ
مارا گیا کبھی مجھے زندہ کیا گیا
مجبور کردیا گیا اُس بد نصیب کو
پھر اُس کی عقل و فہم کا سودا کیا گیا
طوفاں کی زد میں چھوڑ کے ننھے چراغ کو
انسانیت کے ساتھ تماشا کیا گیا
ہر زاویئے سے توڑ کے دیکھی گئی حیات
عادل پہ صبح و شام نشانا کیا گیا

ایوب عادل

Masjid Mahalla, Post. Angus
Hooghly- 712221
Mob: 9331644486
بشکریہ ’’میر بھی ہم بھی‘‘	مرتب: مشتاق دربھنگوی
………………………