غزل

ملی کچھ ایسی ہم دونوں کو لذت آنکھوں آنکھوں میں
ہوئی اس شوخ سے ہم کو محبت آنکھوں آنکھوں میں

مسلسل لذت و راحت مسرت آنکھوں آنکھوں میں
کہ ہو آباد جیسے کوئی جنت آنکھوں آنکھوں میں

جو باہم دیکھنے کی ہو جسارت آنکھوں آنکھوں میں
محبت ہو رہے بہر محبت آنکھوں آنکھوں میں

دلِ مجرم کی ہے پیہم وکالت آنکھوں آنکھوں میں
سجا ہو جیسے دربارِ عدالت آنکھوں آنکھوں میں

زباں خاموش ہو پھر بھی بیان ہوجاتا ہے قصہ
نظر کہہ دیتی ہے ساری حکایت آنکھوں آنکھوں میں

جو آنکھیں پھیر لیں اس نے ہوا ویراں جہاں ایسا
کہ جیسے بدر آجائے قیامت آنکھوں آنکھوں میں
…………………………