* Khulataa nahii’n hai haal kisii par kahe baghair *
Khulataa nahii’n hai haal kisii par kahe baghair
par dil kii jaan lete hai’n dilbar kahe baghair
mai’n kyuu’nkar kahuu’n tum aao ki dil kii kashish se vo
aayenge daude aap mere ghar kahe baghair
kyaa taab kyaa majaal hamaarii ki bosaa le’n
lab ko tumhaare lab se milaakar kahe baghair
bedard tuu sune naa sune lek dard-e-dil
rahataa nahii’n hai aashiq-e-muztar kahe baghair
taqdiir ke sivaa nahii’n miltaa kahii’n se bhii
dilavaataa ai "Zafar" hai muqaddar kahe baghair
|