Dil pe karate hain dimaagoon pe asar karate hain, 
ham ajab log hain zehanoon mein safar karate hain. 
Jab saraape pe kahin us ke nazar karate hain, 
meer saahab ki tarah umr basar karate hain. 
Bandishein ham ko kisi haal gavaara hi nahin, 
ham tou vo log hain deewar ko dar karate hain. 
Waqt ki tez-Kharaamii hamein kya roke gii, 
janbish-e-kalk se sadiyoon ka safar karate hain. 
Naqsh-e-paa apana kahin raah mein hota hi nahin, 
sar se karate hain mohim jab ko_ii sar karate hain. 
Ham-nashiin Khuub hai ye mahafil-e-yaaran ke yahan, 
vo saliqaa hai ke aiboon ko hunar karate hain. 
Kya kahein haal tera ai mutamaddin duniya, 
janvar bhi nahin karate jo bashar karate hain. 
Ham ko dushman ki bhi taqleef gavaara na hu_ii, 
log ehabaab se bhi sarf-e-nazar karate hain. 
Marqadoon pe tou charaagaan hai shab-o-roz magar, 
umr kuch log andheroon mein basar karate hain. 
Tazakara Meer ka Gaalib ki zaban tak aaya, 
aitaraaf-e-hunar, arbaab-e-hunar karate hain....