Mere saath tum bhii duaa karo yoo’n kisii ke haq me’n buraa na ho 
kahii’n aur ho na ye haadasaa koii raaste me judaa na ho

mere ghar se raat kii sej tak vo ik aansuu kii lakiir hai 
zaraa bad ke chaand se puuchhanaa vo isii taraf se gayaa na ho

sar-e-shaam thaharii huii zamii’n, aasamaan hai jhukaa huaa 
isii mod par mere vaaste vo charaagh le kar khadaa na ho

vo farishte aap hii dhuundhiye kahaaniyo’n kii kitaab me 
jo buraa kahe’n na buraa sune koii shakhs un se Khafaa na ho

vo visaal ho ke firaaq ho terii aag mahakegii ek din 
vo gulaab ban ke khilegaa kyaa jo charaagh ban ke jalaa na ho

mujhe yoo’n lagaa ki Khaamosh Khushbuu ke honth titalii ne chhuu liye 
inhiin zard patto’n kii ot me koii phuul soyaa huaa na ho

isii ehatiyaat me’n mai’n rahaa, isii ehatiyaat me’n vo rahaa 
vo kahaan kahaa’n mere saath hai kisii aur ko ye pataa na ho