Nawazish se khurd ki, ya junu'n ki meharbani se
Chalo kuchh to ta'aruf hogaya hai zindagani se

Fasano'n se na qisso'n se na ulfat ki kahani se
Hua jadoo dilo'n par sher ki shola fashani se

Khaza'n to hochuki rukhsat bahut muddat huii lekin
Baharo'n me'n chaman mahroom, keyo'n hai shadmani se

Na samjha aaj tak koii fasana meri chahat ka
Hazaro'n dastane'n ban gayee'n meri kahani se

Zaroorat hai amal ki bhi agar ho'n Khawahishe'n dil me'n
Badalte hai'n kaha'n halaat hasti khush gumani se

Tazaad-e-fitrat-e- aalam hai yak jaii nahi'n mumkin
Taaluq aag ka "Bedil" nahi'n hota hai pani se

			Editor "Sant Nirankari" Monthly, Sant Nirankari Mandal
			Nirankari Colony, Delhi-110009