* Kuchh is adaa se milte ho jaanaa’n kabhii kabhii *
Kuchh is adaa se milte ho jaanaa’n kabhii kabhii
kaante bhii lagne lagte hai’n kaliyaa’n kabhii kabhii
jab zabt-e-Gham dil pe na jaanaa’n koii rahaa
motii sajaa liye hai’n sar-e-mizshgaa’n kabhi kabhii
shaayad ke naahhudaa ko bhii logo Khabar na thii
rukh apnaa mod letaa hai tuufaa’n kabhii kabhii
kuchh yuu’n lagaa ki husn sitaaro’n me’n ghir gayaa
dekhii jo un kii maang me’n afshaa’n kabhii kabhii
dil par lagii jo chot to jii bhar ke ro liye
yuu’n bhii kiyaa hai dard kaa darmaa’n kabhii kabhii
naadaan ho is qadar tumhe ye bhii Khabar nahii’n
chaltaa hai maslehat se biii insaa’n kabhii kabhii
tum un ko kyaa kahoge jo jhuuthii anaa ke saath
dekhe gaye libaas me’n uriyaa’n kabhii kabhii
iisaar me’n vafaa me’n aqiidat me’n pyaar me’n
'Ejaz' vo lagaa hai numaayaa’n kabhii kabhii
|