Zindagi ke har ta-alluq ka karam hone to do
Rozo shab me fasla thoda sa kam hone to do
Waqt ki zarkhez mitti haath me a jayegi
Sa-ate azm-e-yaqeen ko aur nam hone to do
Kab talak pushta lagaun main faseele jism par
Theek sab ho jayega unka karam hone to do
Mujhpe raushan ho hi jayega hare ek raz-e-hayat
Meri binayi ko thoda mohtaram hone to do
Tumko jine ki tarah jine ka fun a jayega
Ka-saye dil ko zara labreze gham hone to do
Ek paude ne ye bargad se guzaish ki zaya
Apne sadqe me mujhe bhi muhtashim hone to do
Fikro fun me yun hadeese sher zam hone to do
Matlaye sani ko phir se khush qadam hone to do
Bad muddat yad rakhega zamana bilyaqeen
Dastane zindagi apni raqam hone to do
Khatm ho jayegi ye tere takabbur ki bisaat
Waqt ki maujo.n me thoda ze-o- bam hone to do
Sab ke hisse ki hadeese agahi mil jayegi
Aye zaya dil ki zameen ko thoda nam hone to do
*************************