Nigahe bekhata phir bhi jigar ke paar chalti hai
Idhar main sar uthata hoon udhar talwar chalti hai
Kabhi is paar chalti hai kabhi us paar chalti hai
Hawaye maslehat rah rah ke shola bar chalti hai
Bada khudgarz hai is daur ka har aadmi zahid
Ibadat ke pase pardah talab do char chalti hai
Nahi kasa yaqee.n ka hai gadaye be amaa.n hoon main
Barahna sar ana meri pas-e-deewar chalti hai
Kabhi sudo zayan ki fikr se aazad ho zahid
Ke bazaar-e junu.n mein azmat-e-dastar chalti hai
Ye kya turfe tamasha hai ke har bazm-e-tamanna mein
Nidamat ki mere hi sar pe kyun talwar chalti hai
Larazta rahta hai ab khanaye dil gham ki aandhi se
Kabhi chhat udne lagti hai kabhi deewar chalti hai
Yahi to hota aya hai kare koi bhare koi
Chhuri gardan pe hai meri magar har bar chalti hai
Mujhe aasebi zeene kya mere saaye darate hain
Ajab hai khauf ka manzar nazar bezar chalti hai
Mahaze-jung se pahle jala dee.n kashtiya.n sari
Ke apne zore bazu par faqat talwar chalti hai
Kisi ki kab chali hai umr bhar Ejaz duniya mein
Kahin har bar chalti hai nahi harbar chalti hai
Meri parchhai.n bhi Ejaz koi chhoo nahi.n sakta
Ke mere pichhe pichhe waqt ki raftaar chalti hai
**********************