Mairay dil maiN teri chahat ke siwa kuch bhi nahiN
Iska anjaam halakat ke siwa kuch bhi nahiN

Zindagi kaisay guzar paye tere bin hamdam
Zindagi jab teri adat ke siwa kuch bhi nahiN

Zeest ke saath hui khatm ye saaye ki talaash
Haasil-e-zeest tamazat ke siwa kuch bhi nahiN

Usko chaha hai jo barsoN to samajh paya hooN
Uska inkaar ijazat ke siwa kuch bhi nahiN

Apnay halaat badalnay ki faqat aik kaleed
Apni bigRi hui halat ke siwa kuch bhi nahiN

Ya Khuda kaisa maqaam aya hai jeewan maiN mere
Mairay chehre pe nidamat ke siwa kuch bhi nahiN

Ye khushi pal ki hai, mat iska bharosa karna
Ye to qismat ki shararat ke siwa kuch bhi nahiN

Kitni mayoos hai ye teri nawa aaj Saraab!
Jisko matloob sama'at ke siwa kuch bhi nahiN
*****