Aur is ishq ka anjaam bhala kia hota
Dard jaisa koyee in'aam bhala kia hota

Kaif milta hai jo is khaak-nasheeni maiN hamaiN
BistaroN per hamaiN araam bhala kia hota

Dil ko jalnay ki jo adat hai to dozakh ki talab
Ye kabhi taarik-e-asnaam bhala kia hota

Kar dia ham ko jo ilzaam-e-mohabbat se bari
Is se baRh kar koyee ilzaam bhala kia hota

Jeetnay waloN maiN, na haarnay waloN maiN hai naam
Apnay jaisa koyee nakaam bhala kia hota

ChHoRay jata hai kh'moshi se tera shehr Saraab
Aur is shehr maiN badnaam bhala kia hota
******