|
* Aisa kahaaN ke shehr se khaali chalay gaye *
Aisa kahaaN ke shehr se khaali chalay gaye
Jholi maiN dard bhar ke sawali chalay gaye
Maloom tha ke raah adam ki dikhaai hai
Phir bhi tumhari baat na Taali, chalay gaye
Daikha tha laRkhaRa ke bhi, aya nahiN koyee
Hasti phir apni aap saNbhaali, chalay gaye
Aye tumharay shehr maiN to kia bura kia?
AaNkhoN ki thoRi pyaas bujha li, chalay gaye
Ham jin ke intezaar maiN khud ko sajaaye thay
Aye to ek nazar bhi na Daali, chalay gaye
Ab kia chaman sajay ga kabhi apnay dais ka
Is baagh ko to chHoR ke maali chalay gaye
ToofaN ke waqt ek hi kashti thi shehr maiN
Afsos! us maiN shehr ke waali chalay gaye
Dunya maiN ek naqsh bhi chHoRa nahiN Saraab!
Ham sang apni khaam khayaali chalay gaye
******* |
|