* La-ta'alluq wo banay haiN meri ruswayee se *
La-ta'alluq wo banay haiN meri ruswayee se
Phir gila kaun karay aik tamashayee se
Aik lamhay ko bhi tanha nahiN hotay wo log
Umr bhar saath nibhatay haiN jo tanhayee se
Aaj phir kis liye badal maiN chHupa jata hai
Chaand Darta hai faqat teri khud-arayee se
Raaz-e-dil kehne ki koshish ka nateeja ye hua
Raaz dil maiN hi raha, lab gaye goyayee se
Mat bahanay se mere zakhm kuraid, aye dunya!
Tu mujhay baaz hi rakh apni maseehayee se
Isko aateeN hi nahiN sood-o-zyaaN ki baateN
Koyee sauda nahiN kar paayega saudayee se
Ham ne maana ke tamanna teri kuch aur sahi
Ek ghaRi mil to le is apnay tamannayee se
Saari dunya ka bharam rakhnay ki koshish maiN Saraab
Saari dunya ko laga kartay haiN harjayee se
****** |