|
* MuddatoN se aaNkh apni, raat bhar nahiN lagti *
MuddatoN se aaNkh apni, raat bhar nahiN lagti
Is liye sahar ham ko, ab sahar nahiN lagti
Waqt ke tasalsul maiN, aik si siyaahi hai
Roshni koyee ham ko, moatabar nahiN lagti
PaththaroN ke seenay par, dastaan likh paaye
Is qadar qavi to ye, chashm-e-tar nahiN lagti
Rooh maiN samaayee hai, is tarah ye tanhaayee
Koyee shaye bajuz ham ko, baam-o-dar nahiN lagti
Aasmaan par bijli, zor se jo kaRki hai
Ye bhi dil ki halat se, bay-khabar nahiN lagti
Zindagi ka kia kahiye, tab udher hi laati hai
Apni ye tabiyyat bas, jab jidhar nahiN lagti
Us ko bhool kar apni, zindagi guzar jaaye
Us ki chashm-e-naaz itni, bay-hunar nahiN lagti
Zindagi ne bakhshay haiN, zakhm is nawayyat kay
Koyee bhi dawa ham ko, kaargar nahiN lagti
YuN to us ki nafrat bhi, hay kamaal ki laikin
Jis qadar mohabbat thi, us qadar nahiN lagti
MuddatoN se bastay haiN, sab Saraab sehra maiN
Phir teri tabiyyat kioN, apnay ghar nahiN lagti
****** |
|