Din suhana teri talaash maiN hai
Waalihana teri talaash maiN hai

Jis ko tu ne adhoora chHoR dia
Wo fasana teri talaash maiN hai

Ek mujhi per ye barhami kioNkar
Kul zamana teri talaash maiN hai

Ye to khud ab usay bhi yaad nahiN
KioN diwana teri talaash maiN hai

KioN na qatil ho tu aye teer-e-nazar
Khud nishana teri talaash maiN hai

Meray shahbaaz! tu buland to ho
Aab-o-daana teri talaash maiN hai

Tujh se pehle se aye sitam! dil maiN
Ek bahana teri talaash maiN hai

Garmi-e-ishq! aa ke is dil ka
Sard-khaana teri talaash maiN hai

Tujh pe saabit hai jurm-e-ishq Saraab! 
Taazyana teri talaash maiN hai
*******