Baat bay-baat teri baat nikal aati hay
Din nikaltay hi yahaN raat nikal aati hay

Roz sooli pe laTakna mujhay paR jata hay
Roz wo soorat-e-halaat nikal aati hay

Jab ke us shakhs se nazreN bhi milana ho mahaal
Tab hi taqreeb-e-mulaqaat nikal aati hay

Jeet janay ki tamanna bhi bhala kaisay karooN
Jeetnay maiN jo teri maat nikal aati hay 

Aaj kal neend maiN Dar jata hooN aksar hamdam!
Mairay andar se meri zaat nikal aati hay

Ya ye dil nauha-kinaaN marg-e-tamanna pe rahay
Ya yahaaN yaadoN ki baaraat nikal aati hay

Jis ghaRi zakhm mere sookhnay walay hoN Saraab!
Us ghaRi shehr maiN barsaat nikal aati hay
******