غزل


نثار ہم پہ سمندر ہوا‘ ہوا نہ ہوا
ہمیں کچھ آب میسر ہوا‘ ہوا نہ ہوا

مرے خیال‘ مری جستجو کا حاصل وہ
میں اُس کی دید کا محور ہوا‘ ہوا نہ ہوا

مرے خلوص‘مرے لمس کی حرارت سے
ذرا بھی موم وہ پتھر ہوا‘ ہوا نہ ہوا
 
یہی بہت ہے کہ سایہ تو دے رہا ہمیں
شجر بلا سے ثمرور ہوا‘ ہوا نہ ہوا 
 
کئی گھروں کے چراغوں کو کر دیا روشن
گھر ایک میرا منور ہوا‘ ہوا نہ ہوا
 
 ہمارا کام تھا صحرا کو سینچتے رہنا
ہمیں نصیب گلِ تر ہوا‘ ہوا نہ ہوا

دلوں پہ راج تو کرنا نصیب ہو ہی گیا
فراغؔ‘ میں کوئی افسر ہوا‘ ہوا نہ ہوا



فراغ روہوی
67, Maulana Shaukat Ali Street(Colootola St.),Kolkata-700073,INDIA
Mob.:9831775593/9830616464,E-mail:faraghrohvi@gmail.com