نعت پاک

خدا کا آئینہ ہے دیکھئے صفاتِ رسولؐ
شمار کیسے کرے کوئی معجزاتِ رسولؐ

وہ شاہِ ملکِ عرب اور پیٹ پر پتھر
مثال بن گئی سب کے لئے حیاتِ رسولؐ

بغیر حکمِ خدا آپ کچھ نہیں کہتے
مگر جدا نہیں حکمِ خدا سے باتِ رسولؐ

فرشتے وجد میں آجائیں اور درود پڑھیں
ارادہ کرکے میں جب کہنے بیٹھوں نعتِ رسولؐ

یہ مہر و ماہ زمیں پر اتر کے کہتے ہیں
ہزار عید سے افضل ہے چاند راتِ رسولؐ

ہے عرش و فرش محبِّ رسولؐ کا فرحت
ہماری ہے نہ تمہاری یہ کائناتِ رسولؐ

فرحت مشتاق

G40, Bangla Basti, Garden Reach
Kolkata-700024
Mob: 8981560304 / 9062126088
بشکریہ ’’عندلیبانِ طیبہ‘‘ مرتب: مشتاق دربھنگوی
……………………………………