غزل

اہلِ کرم کا ساتھ ، نہ اہلِ ہنر کا ساتھ
اپنے نصیب میں تھا کسی بے خبر کا ساتھ

شہروں کی وسعتوں میں بلا کی کشش رہی
وہ چاہ کر بھی دے نہ سکا میرے گھر کا ساتھ

شب کے مکاں میں کتنے جھروکے بنا گئی
وہ شمع جو کہ دے نہ سکی تھی سحر کا ساتھ

منزل پہ بھی قدم نے ٹھہرنے نہیں دیا
ذوقِ سفر نہ چھوڑ سکا رہ گزر کا ساتھ

تنہائیوں کا زہر پیا تب کھُلا یہ راز
’’لازم ہے زندگی میں کسی ہم سفر کا ساتھ‘‘

کچھ پست حوصلہ تھی مری چھت جو گرگئی
ظالم ہوا بھی دے نہ سکی بام و در کا ساتھ

فن کو جلا ملی مرے ، اقبال سے فرح
سب کو کہاں نصیب کسی دیدہ ور کا ساتھ

 ڈاکٹر) فرزانہ فرح)

Al-Warood
Mohiuddin Street
Madina Colony
Bhatkal - 581320
(Karnataka)
Mob: 9886571233
بہ شکریہ جانِ غزل مرتب مشتاق دربھنگوی
+++