* sukhan jo os ney kahey thay girah sey baandh liye *
sukhan jo os ney kahey thay girah sey baandh liye
khyaal osi key thay so so tarah sey baandh liye
woh ban sunwar key jo niklay to chhairti thi saba
phir os ney baal he apney saba sey baandh liye
milay baghair woh hum sey bichhar nah jaaye kaheeN
yeh waswasay bhi dil e mubtila sey baandh liye
hamharey dil ka chalan bhi to koi theek naheeN
kahaN key ehad kahaN ki fiza sey baandh liye
subab yahi hay humharey udaas rahney ka
qarar hum ney kisi khush ada sey baandh liye
woh ab kisi bhi waseelay sey hum ko mil jaye
so hum ney apney iraaday dua sey baandh liye
meiN ik thaka huwa insaan oar kya karta
tarah tarah key tasawwar khuda sey baandh liye
Fazil Jamili
|