kam sini key ehd thay, on kam sinoN ka shukriya
dau dinoN ki dausti thi, dau dinoN ka shukriya
 
is qadar bay gaanagi meiN kaun kis ka aashna
hum peh jau zaahir huwey on baatinoN ka shukriya
 
jin key dil meiN parbatoN key baasiyoN ki jaa naheeN
shehr e kam aamaiz terey saakinoN ka shukriya
 
tujh sey milney key liye kis kis sey milna parh gia
ab ada karna hay kin kin mohsinoN ka shukriya
 
raat din baateiN huwa karti theiN telephone par
jin dinoN ki baat hay yeh on dinoN ka shukriya
 
jaisey taisey zindagi apni guzar he jaaye gi
mumkinoN ki khair ho, na mumkinoN ka shukriya
 
Fazil Jamili