* guzashta aik sadii key nigaar khaaney mein *
guzashta aik sadii key nigaar khaaney mein
sajii hoi hein merey qatilon ki tasweerein
kisii key roo e munawwar peh khoon ki surkhii
kisii key dast e sitam par hina ki tehreerein
kaheen kaheen peh munaqqash hein kuch dar o deewar
keh jin sey aaj bhi aati hai merey khoon ki boo
woh khoon jo merey dil mein thaa oar khushboo thaa
woh khoon jo merey haathon mein aik jugnoo thaa
woh khoon merey liyee ek khushii ka aansu thaa
khushii ka aik yeh aansu bhi chheen'ney waala
ek aisa dushman e jaan bhi yahaan sey guzra hai
kai hussain tah e taigh kar diyee jiss ney
lahoo sey kitney hi taalab bhar diyee jiss ney
woh hiroshima ho koi keh nagasaki ho
subhi ko khoon mein nehlaa key rakh dia oss ney
mein karun mujhey tarrpa key rakh dia oss ney
ossi key bhai uthaa laaey hein nahi talwaar
aor aaj tak hein merey saath bar sar e paikaar
onhein khabar nahi shayed keh inqilaab hun mein
oar ingilaab to oss zindagi ko kehtey hein
jo zakhm kha key bhi zinda hai mar nahi sakti
kissi ghaneem lutairey sey dar nahi sakti
issi tarah key lutairey banam e dharam
shabana roz mujhey qatl kartey rehtey hein
phir oss key baad merey khoon mein nahaatey hein
naha key khoon mein jashn e tarab manaatey hein
koi yahan sey parey bhi hai jashn mein shaamil
jo merey khoon ko peeta hai oar jeeta hai
magar lahoo key nashey mein yeh bhool betha hai
keh zakhm khaa key phalasteen ho gia hun mein
mein poori aik saddi ka hun aalmi maqtool
eh saal e noa mujhey apney nisaab mein rakhna
mein qatl ho key bhi FAZIL bus itna chahta hun
keh merey khoon ki shabnam gulaab mein rakhna
|