gurrya si lag rahi thi wo neelay frock meiN
khilney lagey thay phool mohabbat key khaak meiN
 
 itni thi khush khiraam keh jaisey naseem e subh
dekha tha meiN ney os ko kisi cat-walk meiN
 
achha huwa keh tum sey mulaqaat ho gayi
barhney lagey thay chaak garaibaaN key chaak meiN
 
lagta naheeN hey apney mohallay meiN dil kaheiN
rehney lagey heiN jab sey woh agley block meiN
 
sehmi huwi gali sey guzarti heiN larrkiyaaN
aankheiN kisi ki jaisey shikaari hoN taak meiN
 
dunya zan e kharab ney kya kya nah dukh diye
dil apna khush khayal tha aaya nah dhaak meiN
 
baitha huwa huN ab bhi samandur peh os jagah
rooheiN jab apni aik theiN hontoN key lock meiN
 
ab tak gharri hey tees minute par ruki huwi
saddiyoN ka husn tha osi aadhey clock meiN
 
mujh sey bichharr key woh bhi to weeran ho gayi
kaanoN meiN baaliyaaN heiN nah koka hey naak meiN
***************