|
* khud ghazaalaN ki kashish, khud rum e aahoo hotieN *
khud ghazaalaN ki kashish, khud rum e aahoo hotieN
larhkiyaaN phool na hoteiN bhi to khushboo hoteiN
koi yaadoN meiN kaheiN phool khilaaey rakhta
baarisheiN khawab jazeeroN meiN bhi har soo hoteiN
hum bhi heela, na bahaana, na yeh toona kartay
woh chamakti hoi aankheiN jo na jaadoo hoteiN
dil meiN kya kuch hae ose kaash bata bhi sakta
khawisheiN, khawab na hoteiN, mere aansoo hoteiN
ruqs gaahoN meiN jo 'hum raqs' pukaare jaate
dum ba dum tum he mere pehloo ba pehloo hoteiN
maaNeiN bunteiN jo koi khawab duaaoN ki tarah
betiyaaN titliyaaN, taare, kabhi jugnoo hoteiN
meiN sunwarta, meiN nikharta, meiN bikharta rahta
mairi raateiN bhi jo os shaukh ke gaisoo hoteiN
os ko chhoone ke liye door ufaq tak jaata
mairi poreiN, mairi socheiN jo pakhairoo hoteiN
aab e kausar ki qasam , piyaas ki shiddat ki qasam
tum he tum ho jo mere dard ka daaroo hoteiN
apni hairat se kisi oar he wahshat ki taraf
tum bhi dunya se nikalteiN, koi saadhoo hoteiN
os ki angrhaayiaaN hoteiN na guraizaaN mujh se
mairi aankheiN , mairi saanseiN , mere baazoo hoteiN
Fazil Jamili
|
|