tum aa rahi ho ba sad naaz mere dil ki taraf
nayi rutoN ka ha aaghaaz mere dil ki taraf
 
zamaaney baad suni ha kisi ki sargoshi
ha koi dard ki aawaaz mere dil ki taraf
 
phir aik baar tabiyat bahaal hone lagi
phir aa geya mera damsaaz mere dil ki taraf
 
meiN apne dil ki taraf se ussey mana loon ga
jab aaye ga koi naaraaz mere dil ki taraf
 
kisi ke dil he ne izn e safar diya ho ga
ke chal parray heiN kai raaz mere dil ki taraf
 
meiN tere baad kisi ki taraf na dekhoon ga
bas ik nigah e fusoon saaz mere dil ki taraf
 
kisi ki neend bhari guftagu ne chhairr diye
kayi surood, kayi saaz mere dil ki taraf.
 
Fazil Jamili.