samandaron key safar ney 
itna thaka dia hai 
keh apney ghar mein qiyaam karna bhi 
ab thakan hai 
kisi sey koi kalaam karna bhi 
ab thakan hai 
woh jin sey baatein karein 
to raatein guzarti jayein 
onhein namastey salam karna bhi 
ab thakan hai 
samandaron ki thakan utarney mein 
dair lagtii hai jaanta hon 
koi dhanak ho keh apsara ho 
nidhal ho kar bhi raks mein ho 
jo aasmaanon sey paaniyon mein 
utarti chaandi key aks mein ho 
woh jal pari ho, 
yeh maanta hon 
magar zara dair key liyee tum 
merey khiyalon key narm bister peh let jao 
jo khawab poorey nahi hoey hein 
woh khawab dekho..... 
koi sitara kahein hamhara bhi ho ga roshan 
tum oss sitaarey ko aankh bhar kar 
jo dekh lo gi 
to pehley jitney safar kiyee hein 
kisi safar ki thakan rahey gi 
na ghar mein apney qiyaam karney 
kisi sey koi kalaam karney 
dua, namastey , salam karney mein 
koi uljhan, kasak rahey gi 
rahi agar to 
dil o nazar mein naey safar ki 
chamak rahey gi...