برفباری کی رُت

یہیں تو کہیں پر
تمہارے لبوں نے
مرے سرد ہونٹوں سے برفیلے ذرّے چُنے تھے
اسی پیڑ کی چھال پر ہاتھ رکھ کر
ہم اک دن کھڑے تھے 
یہیں برفباری میں ہم لڑکھڑاتے ہوئے جا رہے تھے 
مہک تازہ بوسوں کی سُر میں سمائے
ہم آغوشئی جسم و جاں کے نشے میں 
گئی برفباری کی رُت
اور پگھلتی ہوئی برف بھی بہہ گئی سب
یہاں کچھ نہیں اب
کہ ہر شے نئی ہے 
ہٹا کر ردا برف کی ، گھاس لہرا رہی ہے 
ہری پتیوں کی گھنی ٹہنیوں میں 
ہوا جب چلے تو
گئے موسموں سے گزرتی
ہماری ہنسی گونجتی ہے 

(فہمیدہ ریاض)