Aiwaan-e-adalat mein
Pathrai hui aankheN
Pathraey hoey chehrey
Pathrai hui saaNsen
ChamaDe ki zubaanoN par
Pathrai hui baateN

Faryaad kaTehrey mein 
Ro ro ke tarrapti thi
Qaanun k rakhwaley
Kal ley k gaey jis ko
Ab us ko yahaN laeiN
Wo naash to dikhlaeN

Pathraey hoey chehrey
Ek dam koi dil dharrka
Shola sa kahiN bharrka
Jab tak k koi samjhey
Lo phatt bhi gaey dhaarey
AawazeN mileeN baaham
Aur goonj uThey naarey
Maasoom si jaanoN k 
Beytaab jawanoN k
Kya shor lahu ka tha
Kya goonj thi naaroN mein

Aiwaan-e-adalat mein 
Pathraey hoey kamrey
Dam roke k suntey they 
Jab surkh salaam aaya
Maqtool ka naam aaya
GhooNsa sa laga dil par
AankhoN sey lahu phooTa
Jeetey raho dil waloN
Patthar to koi TooTa