غزل

٭……فیروزخسروؔ

ہے دشمن جاں، یار طرحدار ہے جنگل
مرہم ہے کبھی اور کبھی تلوار ہے جنگل
ہیں زیرِ اماں ظالم و مظلوم، بظاہر
ہر ایک کا ہمدرد ہے غمخوار ہے جنگل
اے دوست یہاں ذلت و خوار ہے مقدر
گر زور ہے بازو میں تو دستار ہے جنگل
ناواقفِ آداب میں خونخوار درندے
تنہا نہ ادھر آئیے، سرکار ہے جنگل
تھا سمٹا ہواآنکھ کی پتلی میں مرا شہر
پھیلا ہے تو اک نقطۂ پرکار ہے جنگل
جنگل تھا جہاں آج ہے خلقت وہاں آباد
دیوار و در و کوچہ و بازار ہے جنگل
آلودگی بڑھتی چلی جاتی ہے ہر اک سانس
کیسے نہ کہیں اب ہمیں درکار ہے جنگل
اک موجِ تخیر لئے پھرتی ہے نظر کو 
اس پار ہے جنگل ابھی اس پار ہے جنگل
اک ہاتھ ہے  اور ہاتھ میں آئینہ وحشت
اک شخص ہے اور کوچہ دلدار ہے جنگل
کس شے کی کشش ہے جو تجھے کھینچے ہے خسروؔ
کیا حور و پری زاد و پری وار ہے جنگل
*****