Us ne haNs kar hameN pukaaraa kya
Ho gayaa phir se woh hamaaraa kya?

Jashn sa shahr e jaaN me kaisa hai
Aa raha hai wo maah paaraa kya?

Aarzoo, khaab, aas, mahroomii !!
Hausla phir bhi hum ne haaraa kya

Meri aankheN udaas rahti haiN
Ab na aaye ga wo dobaaraa kya?

AsmaaN par nazar nahi aataa
Khogaya hai mera sitaaraa kya

Dard  ki  saltanat pe baithaa hai
Koi  farma-N-rawaa dobaaraa kya

Ae dil e beqarar -  rahne de!!!
Shahr e taskeen me hamaaraa kya

Chaar aansu bahake sab chup hain
RayegaaN qatl hai hamaaraa kya
****