نارسائی میں فغاں کی آبرو ہے دوستو
 عاشقی پیہم تلاش و جستجو ہے دوستو
 آئینہ خانے میں کیا رکھا ہے حیرت کے سوا
 جو نظر آتا ہے عکس آرزو ہے دوستو
 کچھ نہ کہہ کر بھی بہت کچھ کہہ دیا کرتے ہیں لوگ
 خامشی بھی ایک طرزِ گفتگو ہے دوستو
 تاک میں صہبا، گلوں میں بو، صبا میں پیچ و خم
 سب کرشمہ سازی ذوق نمو ہے دوستو
 دل تو دیوانہ سہی لیکن ہوس کا کیا علاج
 ہوش کا دامن بھی محتاجِ رفو ہے دوستو
 ہر قدم پر جل رہے ہیں راہ الفت میں چراغ
 ہر قدم پر نقش پائے جستجو ہے دوستو
 کوشش عرض ہنر ظاہر میں ہے تاباں کی غزل
 اور درپردہ کسی سے گفتگو ہے دوستو
 *******************************