Mohabbat ki rangeenian chho'r aa'e,
Tere shehar main ik jahan chho'r aa'e,

Pahar'ron ki wo mast-o-shadaab wadi,
Jahan hum dil-e-naghma' khawan chho'r aa'e,

Wo sabza, wo darya, wo pair'ron ke saye,
Wo geeton bhari bastiaan cho'r aa'e,

Haseen Panghto'n ka wo chandi sa panii,
Wo Berkha ki rut wo samaan chho'r aa'e,

Boht se milay humsafar rastay main,
Nahi yaad kis ko kahan cho'r aa'e,

Boht dur hum aa gaye us gali sey,
Boht dur wo astaa'n chho'r aa'e,

Boht mehrbaan thi'n wo gul-posh rahain,
Magar hum unhain mehrbaan cho'r aa'e,

Bhagolon ki surat yahan phir rahay hain,
Nasheeman sar-e-gulista'an chho'r aa'e,

Ye Aijaz Hai husn-e-awaargi ka,
Jahan bi gaye dastaan chho'r aa'e,

Chalay aa'e un rahguzaaron sey "Jalib",
Magar Hum wahan qalb-o-Jaan Chho'r aa'e.