Is shahar-e-Kharaabii me.n Gham-e-ishq ke mare,
zindaa hai.n yahii baat ba.Dii baat hai pyaare,

ye ha.Nsataa huaa chaa.Nd ye pur_nuur sitaare,
taabindaa-o-paa-indaa hai.n zarro.n ke sahaare,

[taabindaa-o-paa-indaa = burning bright and eternally]

hasarat hai koii Ghunchaa hame.n pyaar se dekhe,
aramaa.N hai koii phuul hame.n dil se pukaare,

har subah merii subah pe rotii rahii shabanam,
har raat merii raat pe ha.Nsate rahe tare,

kuchh aur bhii hai.n kaam hame.n ai Gham-e-jaanaa.N,
kab tak koii ulajhii huii zulfo.n ko sa.Nvaare.