Dosto kyaa hai takalluf mujhe sar dene me.n, 
sab se aage huu.N mai.n kuchh apanii Khabar dene me.n ,
 
phai.nk detaa hai idhar phuul vo gaahe gaahe, 
jaane kyaa der hai daaman meraa bhar dene me.n, 

[gaahe-gaahe=occasionally] 

shaayarii kyaa hai ke ik umar ga.Nvaa_ii ham ne, 
chand alfaaz ko imkaa.N-o-asar dene me.n ,

[imkaa.N = contingent; asar=impression] 

baat ik aa_ii hai dil me.n na bataa_uu.N us ko, 
aib kyaa hai magar izhaar hii kar dene me.n, 

[aib=fault; izhaar=disclose, express ] 

use maaluum thaa ik mauj mere sar me.n hai, 
vo jhijhaktaa thaa mujhe hukm safar dene me.n, 

mai.n nadii paar karuu.N soch rahaa huu.N 'Bani',
mauj masruuf hai paanii ko bha.Nvar dene me.n.