Halaku ab jo tum Baghdad aaoge,
to sail-e-khuuN se Dajlaa apne saahil dho chukaa hogaa,
yahaaN ek aur lashkar, 
aatish-o-aahan ka lashkar chhaonii Daale paRaa hogaa,
kaii sau saal se yeh shahar apnii be-sukuunii meN,
kabhii soyaa na thaa, so aaKhir so chukaa hogaa,

Halaaku ab jo tum Baghdaad aaoge,
yahaaN lasheN milengii, lekin unke sar nahiiN honge,
saroN kaa ek minaara tumhaare shahar meN aane se pahle ban chukaa hogaa,
galii kuuche saraayeN khaanqaaheN qahvaa-Khaane,
apne saaye ke muqaabil haath phailaaye khaRe honge,
kutub-khaanoN kii Khaakastar uRaaii jaa chukii hogii,
navaadir boriyoN meN bat chuke hoNge,
kalaam Allah ke naayaab nusKhe aur sahiife,
ki jin ki diid se taariiKh kaa siinaa munavvar thaa,
jalaaye jaa chuke hoNge,

Halaku ab jo tum Baghdad aaoge,
Alif Lailaa ki raateN daastaanoN se nikal kar,
dhuup kii chaadar lapeTe ret ke TiiloN pe baiThii,
qissa-goyoN taajiroN sahraanvardoN shaatiroN aur shahzaadgoN ka rastaa tak rahii hongii,
(ki dekheN shahar meN kab raat aatii hai),

Halaaku ab jo tum Baghdad aaoge,
Ali Baba ke sone ke Khariite, Khema-o-khargaah sab luT chuke honge,
jahaaN ashwah taraaz-o-hiila-gar Marjeena rahtii thii vahaan ek aur hii duniaa ke nau sar baaz baiThe haiN,
yahaaN miTTii me jaduu hai, zamiin sonaa ugaltii hai,
havaa meN tel ki buu hai,

Halaaku ab jo tum Baghdad aaoge,
to phir vaapas na jaaoge.