Laayegaa rang zabt-e-fuGhaa.N dekhte raho,
phuTegii har kalii me.n zubaa.N dekhte raho,

[zabt = restraint]

barpaa sar-e-hayaat hai ik hashr-e-daar-o-giir,
detaa hai kaun kis ko amaa.N dekhte raho,

[sar-e-hayaat = in life;amaa.N = protection/safety]

dam bhar ko aastaan-e-tamannaa pe hai hujuum,
jaaye bichharh ke kaun kahaa.N dekhte raho,

[aastaan = threshold; hujuum = crowd]

milne ko hai Khaamoshii-e-ahal-e-junuu.N kii daad,
uThne ko hai zamii.n se dhuaa.N dekhte raho,

 
mahfil me.n un kii shama jalii hai ki jaan-o-dil,
khultaa hai kab ye raaz-e-nihaa.N dekhte raho,

[raaz-e-nihaa.N = buried/hidden secret]

aa_ii nigaar-e-Gham kii sadaa 'Hosh' ham chale,
tum imtiyaaz-e-suud-o-ziyaa.N dekhte raho.

[nigaar-e-Gham = picture of sadness]
[imtiyaaz-e-suud-o-ziyaa.N = differentiate between profit and loss]